حلا فيكي

9 09 2014

بالوقت الحالي، كل أحلامي منصبة ع شي واحد الا وهو: بتمنى مثلا اطلع بشي سرفيس .. افتح هاي يللي بتحمي من الشمس .. ايه مثلا ما فيكي لانو بينزل ع راسك شي الف طن من المستندات والاوراق المطلوبة .. ع فوقا انت مطلوبة: بس لمين … ؟ اذا مثلا في تقارب في مطرح بين وهيدا التقارب يترجم بمعادلة : س-س هيدي غير المعادلة الشهيرة تبع نبيه بري .. هيدي تحديدا “الاكرونيمز ” بمحل ما هو محطوط .. منرجع وبلا طول سيري .. ع فكرة انت سيري والرب حميها متل هاي يللي بتنكتب ع مؤخرة الباصات أو ع مؤخرتهن لا فرق .. ما فيني انسى اجمالا هيدا أكتر شي بيعاني منو .. من جملة ما بعاني أنا كيف بيطلع وزني بسرعة.. معاناة الله وكيلك .. يعني بتشبه معاناة فارس سعيد والامانة العامة تبع 14 آذار من بعد ” انعطافة ” وليد جنبلاط .. اذا نقص وزنك يعني ما زاد .. واذا زاد وزنك يعني ما نقص .. منعاً لاي التباس ممكن يحصل ما في ينقص ويزيد بنفس الوقت .. ايه طيب كيف لكن بينوجد ادامك كل الحلا .. ما انت هوي…

15 آب 2009





نشيد القلق

4 09 2014

بتعيش بدوامة من القلق ..
قلق ع: الجيبة والشغل والحب
وطبعا ما ننسى المصير الوطني
يعني، كلّو قلق ع قلق
مواعيد كل يوم .. بتغطي فيا الوقت
ت ما تحس بهول الصدمة ..
والصدمة ما بتكون عنيفة الاّ بأوقات كتيرة ..
ممنوع تحكي فيا في ظل
المناخ الوطني الجامع ومنعا للانقسام الفئوي
وانت على ما يبدو مش فهمانة
انو كلمة ” مشتاقلك ” هي أكبر تحدي.. بعد تحدي
اقرار الموازنة والتعيينات بصيغة جامعة
وهيدي الصيغة ممنوع تصيغا ..
لانو اذا ولا بد اكتملت .. بدها تقّش أحلامك
ومساقبة .. سبحانه تعالى.. انّو اذا اكتملت على سكرة
وقررت وقتا تخلي 20 % من قدرتك العقلية..
لانو بدك ترجع ع البيت وما ضيع بالعنوان ..
ايه بس بدك تنام يعني .. هونيك بهيدي اللحظة تحديدا ..
بتستنتج ادي هيدا القرار غبي وفاشل
انك تخلي 20 % من عقلك
يعني عمليا صدمة !
لانو عندي موعد دايم مع الامل ..
لانو أهواك ..

وانساك
واتريني بانسى جفاك
واشتاق لعذابي معاك
والقى دموعي فكراك ارجع تاني
وهوي جفاك ومعاك
هيدول التنين سوا ..
القلق بحد ذاتو ..
عطاالله” مش كتير” سليم 
مش 8 ولا 14 آذار 2010





عناية فائقة فيكي

2 09 2014

أسرع من البرق مثلا أو أسرع من عيتاني معزوم على غذا أو عشا ما بتفرق .. هيدي مثلا أبرز العبارات يللي بتنقال عن السرعة .. بس في نوعية سرعة تانية: مثلا شو في أسرع من زمور بينطلق بعد ثانية واحدة بس لما تضوي اشارة خضرا ع تقاطع بشارة الخوري تحديدا .. بطبيعة الحال ما كتير بيمشي من دون تحرك على مستوى ” حس المسؤولية ” .. هيدي اكتر شي بتهلك لانو فيها حس ومسؤولية ماشيين سوا .. بعمرن ما كانو متفقين الا عند قيادة الحزب الشيوعي اللبناني .. فيا حس ومسؤولية وأشياء اخرى بس مش ناوية تستقيل لربما حفاظاً على الحس العام أو ” الاداب العامة ” ما بتفرق. ع فوقا، كان في حدا من مدة وبعدو ” معزوم ” ع الغدا .. هوي حدا وغدا ومتل ما بدو بصير .. في سرعة بديهة هاي نسينا ” نعرج ” عليها، بس مأكد انو عندك كتير منا لانو ” بديهة ” انتي شو حلوة.

20 آب 2009 





على بالي هواك

3 07 2014

خيّ .. فيك تجدد بطاقة أو باسبور أو باب أو تخت .. بس انو كيف فيك تجدد الامل .. كنا حكينا بالسابق عن التسويات يلي بتعيشا كل يوم .. التسوية بتبلش بعضوك التناسلي لما يتهور كتير وبتخلص بالصراع العربي- الاسرائيلي ت ما يضاين كتير .. هيدا يعني 62 سنة بما انو نحن ع تخوم ذكرى النكبة .. لو بتحسي أدي كلماتك منقاية بعناية دقيقة .. بدقيقة واحدة بتخلي كلشي يتغير .. بخصوص ” ميتافورسيز ” حضورك .. انت منيحة .. هيدا يلي عرفتو وفي كمان حدا تاني عرفو: نبيلة صعب فتح الله ( بتعرفيا لاْ)

أقرأ باقي الموضوع »





أكتر من حكي 3

7 12 2012

ما بقا فينا نحكي الاّ اذا تغير شي من جهتك ” يوماً ما “

****

” على رغم الجو المشحون تبعا للظرف المرهون
مطرح معيونك بتكون بحلم شوفك يومًا ما …
بكرا بيخلص هل الكابوس بدل الشمس بتضوي شموس
وعلى ارض الوطن المحروس راح نتلاقى يوماً ما”

أقرأ باقي الموضوع »





أكتر من حكي 2

25 08 2012

إذا ثبت بالوجه الشرعي الملموس إنّو اليسا تؤيد حزب القوات اللبنانية فعلياً بيعني هيدا الشي في رابط منطقي بين ألبومها الاخير والمد الاخواني نظراً لانو القوات من أشد المدافعين عن ” الربيع العربي “. وتانياً الجماعة عندن تاريخ طويل مع المجلس العسكري .. هيدا هوي ذاتو يلي موجود بمصر ف عرفتوا أين تكمن العلاقة الجدلية

الملحدين صار عندن حجة إضافية ت يناقشوا فيا المؤمنين. يعني معقول يكون في الله وتفشل محاولة إغتيال سمير جعجع (وبطرس حرب إستطراداً) .. ايه هيدي الله ما قالها.

أنا بس شوف حسّان الداعوق بيجي ع بالي حطّو بدعاية ال 3G  بلكي بيصير ” بطيء ” .. معقول وزير إعلام هلقّد بدا الكلمة تتطلع من تمو.

أقرأ باقي الموضوع »





أكتر من حكي 1

14 08 2012

ع زاوية الرد شوو بشارع الحمرا .. بتقعد وحدة خمسينية كل يوم بنفس المطرح وبتكون عم تقرا جريدة السفير. هالمرا بتحكي مع حالا حتى إذا فتحت حديث معا .. إنت بتفكر انو عم تحكيك بس هيّ عكس هيك تماماً بتكون عم تحكي مع حالا. ع القليلة هي بتحكي مع حالا وبتعرف هالشي بس إنت لمّا تحكي مع حالك ما حدا بيسمعك. شفت إنو لازم تفكر فيها. مش مهم تضل عم تفكر أساساً المهم تفكر صحّ وإذا جايي بدك تقلي مين بيحدد الصح .. بشرفك بلا مزح هلاء ما إنت عارف كيف تدوّر الزوايا وتربعّا كمان. والذّ شي لمّا تقلي إذا انت منيح .. أنا منيح. خيّ، عم صفّي النوايا وعم صفّي زووم البطاطا. ليك الشبه: بس تصفي زووم البطاطا بتاكل بطاطا مقلية أما لمّا تصفي النوايا بتاكل خرا مشوي. أوووف، قوية هيدي.

أقرأ باقي الموضوع »








Sekkar Melih | ســــكّر مالــــح

قالَ البيتْ خُذوني مَعَكُمْ | أعطيناه الدّمْعُ ورُحنا

مدونة تريلا – خبريات لبنانية متصالحة مع ماضيها

أنا نصف مجنون أبحث عن نصفي الاخر. حياتي كناية عن فوضى منظمّة .. هوايتي المفضلة أن أدفع الامور نحو الهاوية ثم أترقب لحظة سقوطها على نحو يثير اللذة في تكرار مغامرة قاتلة. بين الاكاديميا والحب والنضال .. جنون يخترق جدية الحياة فيجعلها في مرمى النيران

لبناني

مساحة حرة لنقد 14 و 8 آذار ... بلا قيود غير المواطنية

جوعان... مواطن ضد الأنظمة المزورة

هكذا يكون الجوع خطيراً، ثائراً وعميق الإنتماء

%d مدونون معجبون بهذه: